Кон крајот на наредната недела, пратениците повторно ќе гласаат за ратификација на Договорот со Грција, откако шефот на државата денеска изјави дека нема да го потпише указот за негово прогласување.
Потпретседателката на Собранието Фросина Ременски потсети дека по повторното гласање на Законот, претседателот е должен да го потпише согласно член 75 од Уставот.
Ременски вели дека доколку претседателот одлучи да не го потпише и по вторпат Договорот, тој свесно го крши Уставот и ќе го наруши правниот и политичкиот систем во државата, и сериозно се меша во надлежностите на Законодавниот дом, за кој, како што рече, нема право.
-Поради сето ова, ваквото однесување на претседателот може да биде предмет на правни лекови во Собранието, тука мислам на импичментот, но и Уставниот суд и други надлежни институции имаат право, но и обврска да поведат постапки, рече Ременски.
Ременски му реплицира на шефот на државата и во врска со неговиот став дека „спогодбата ја доведува Македонија во положба на потчинетост спрема друга држава, што е кривично дело според член 308 од Кривичниот законик“.
„Прашањето може да го поставиме и вака: Дали претседателот, ставајќи се во интерес на други центри на моќ, не станува кочничар на евроатлантската иднина на земјата и нели, може овој член да се однесува и на Претседателот на републиката, рече Ременски.
Претседателот на државата Иванов одби да го потпише Указот за прогласување на Договорот со Грција, зашто спогодбата била спротивна на Уставот.