Не постојат договори со кои возила од Агенцијата за вработување му се префрлени на Министерството за труд и социјална политика, рече на денешната прес-конференција, министерката за труд и социјална политика, Фросина Ременски.

Таа повторно ги повика дополнителниот заменик-министер Диме Спасов и директорот на Агенцијата за вработување Владо Поповски да си поднесат оставки и за двајцата најави кривични пријави за злоупотреба на службена должност.

Според Ременски, и лани и оваа година, кога дошла како министерка, во министерството за труд и социјала направила попис на движни и недвижни ствари, а овие возила ги нема во ниту еден попис кој го направиле.

Ременски додаде дека во Правилникот за работа на Агенцијата за вработување не е предвидено Директорот да може да отуѓува возила, како и дека отуѓување на возила не може да се направи ако не е донесена одлука на влада. А според министерката, таков документ во министерството нема.

„Еден договор за возила постои, но со тој договор Владата и дава 4 возила на користење на Агенцијата за вработување, а не обратно. Ако возилата за кои зборуваше директорот на Агенцијата за вработување се сопственост на Министерството за труд и социјална политика, не ми е јасно зошто одржувањето и регистрирањето се на сметка на Агенцијата за вработување. Исто така, сакам да прашам дали навистина постојат дупли картички за гориво, четири кај лица вработени во Агенцијата кои бензин точеле на бензиските на „Пуцко петрол“ и четири кај непознати лица од Министерството кои бензин точеле на бензиските на „Макпетрол““, рече Ременски.

Министерката денеска информираше и дека возачот кој во полиција се пријавил дека го возел службеното возило во петокот кога се случија сообраќајните незгоди, од вчера заминал на боледување.

НОВА го контактираше директорот на Агенцијата за реакција на прес-конференцијата, но тој ни рече дека телефонски не дава изјави и сите прашања да му ги испратиме на мејл и во текот на утрешниот ден ќе ни биде одговорено. Се обидовме да стапиме и во контакт со дополнителниот заменик-министер, но Спасов не одговараше на телефонските повици.

Подоцна, во текот на денот од Агенцијата за вработување излегоа со реакција на прес-конференцијата во која пишува дека Ременски се обидува да води црна политичка кампања и зборува работи кои се далеку од реалноста.

„Сите постапки за кои говореше техничката министерка се во рамки на законските процедури. Ја повикуваме во рок 48 часа јавно да се извини за изнесените лаги во спротивно ќе и биде поднесено тужба согласно Законот за граѓанска одговорност за навреда и клевета“, пишува во реакцијата од Агенцијата.