Републиканците во Комитетот за разузнавање на американскиот Конгрес соопштија дека надлежната комисија ја завршила истрагата за руската вмешаност во претседателските избори во 2016 година.
Таа заклучила дека немало заговор меѓу Кремљ и кампањата на претседателот Доналд Трамп.
Нацрт извештајот наиде на одобрување од претседателот Доналд Трамп, но демократите членови во Комитетот го отфрлија.
Републиканците соопштија дека се согласуваат дека Русија сакала да влијае врз изборите со ширење пропаганда и лажни вести на социјалните медиуми.
Во меѓувреме, се повече реакции има на изјавата на рускиот претседател Владимир Путин во интервјуто за Ен Би Си дека Евреите и другите малцинства во Русија би можеле да стојат зад наводното „руско“ влијание врз американските претседателски избори.
Лигата за борба против клевета побара од Путин „брзо ќе ги разјасни“ неговите забелешки, пред тие да предизвикаат понатамошна штета врз заедниците што ги посочи.
Во интервјуто Путин запрашан за мешање на Русија во изборите рече: „Можеби тие не се ни Руси, туку Украинци, Татари или Евреи со руско државјанство, кои исто така треба да бидат проверени. Можеби тие имаат двојно државјанство или зелени карти или можеби Американците им платиле за оваа работа“.