Ревизорскиот ивештај за МЕПСО за 2016 година, кој Владата го усвои на вчерашната седница, ќе биде испратен до Основното јавно обвинителство поради одредени индикативни наоди.
-Има одредени наоди поради кои Владата вчера донесе одлука и заклучи дека овој ревизорски извештај ќе биде испратен до Основното јавно обвинителство со цел овие индикативни наоди да се проверат дополнително и дека доколку Обвинителството смета дека има простор за некакви постапки, да ги започне, изјави на владиниот портпарол на денешната прес-конференција.
Како што посочи Бошњаковски, има два индикативни наоди во извештајот, од кои едниот се однесува на купување на имот од страна МЕПСО во 2012 година, а другиот, исто така за имот на државната компанија, кој не бил впишан во катастарот како нејзин имот, односно имот на државата по раздвојувањето на Електростопанство на Македонија (ЕСМ) во две компании во 2005 година.
-Во 2011 година МЕПСО добил понуда да откупи имот од вкупно 2.178 метри квадратни по цена од 3,7 милиони евра. МЕПСО ја одбива оваа понуда. Две години подоцна истата оваа површина, истиот овој имот, друго правно лице го продава на МЕПСО за 4,8 милиони евра. Ова е првата информација. Втората информација се однесува од времето на двоењето на Електростопанство на Македонија, кога дел од мрежата, далекуводи и сл, трафостаници кои што во сопственост на МЕПСО не биле впишани во катастарот како имот на МЕПСО. Овие објекти ЕВН ги има издадено под закуп и има земено хипотекарен кредит. Во ревизорскиот извештај е наведено дека оваа ситуација мора да се расчисти, односно овој имот е во сопственост на државата, односно на МЕПСО – изјави Бошњаковски.
Во врска со првиот случај, односно купувањето на имотот, во извештајот на Државниот ревизор, се наведува дека образложението на МЕПСО за одбивање на понудата од 3,7 милиони евра за имотот кој бил во истата зграда каде е дирекцијата на компанијата, што Управниот одбор ја донел едногласно, било тоа што компанијата немала пари.
Но, во ноември 2012 година, според извештајот, Управниот одбор на МЕПСО донел одлука за спроведување на постапка за купување на административен деловен простор на истата локација со површина од 2.750 метри квадратни за цена од 4.812.500 евра. Договорот со единствениот понудувач бил склучен на 31 декември 2012 година.
Ревизијата утврдила и дека полномошното за склучување, потпишување и нотарска заврека на договор било дадено на лице, машински инженер вработено како раководител, кое согласно интерните акти на компанијата немало надлежности за извршување на правни работи и не може да биде полномошник.
Што се однесува до вториот случај заради кој Владата ќе го достави извештајот до Основното јавно обвинителство, Ревизорот констатирал селективно постапување на Агенцијата за катастар на недвижности при впишувањето на имотот на МЕПСО.
Имено, со Законот за преобразба на АД ЕСМ во 2005 формирани се АД ЕСМ (сега ЕВН) и АД МЕПСО, и според членот 5-а законот предвидено е Агенцијата за катастар на недвижности по службена должност да изврши евидентирање на средствата во катастарската евиденција во (земјиште и недвижности), што до денот на ревизијата не било направено.
„Со воведувањето на катастарот на инфраструктурни објекти, како дел од катастарот на недвижности, во 2013 година АКН на име ЕВН Македонија извршила запишување во катастарска евиденција на трафостаници, иако истите согласно планот за поделба се во заедничка сопственост со АД МЕПСО“, стои во извештајот, според кој, АКН го одбила барањето од МЕПСО за запишување на правотот на сопственост на инфраструктурните објекти по истиот основ, односно согласно Законот за преобразба.
„Наведеното укажува на селективно постапување на АКН и влијае на остварување на правото на сопственост на АД МЕПСО, дотолку повеќе што врз основа на евидентираните трафостаници чија набавна вредност изнесува 571.308.000 денари засновано е заложно право хипотека во износ од 77 милиони евра што дополнително го отежнува остварувањето на правото на сопственост и влијае на остварување на дејноста на МЕПСО“, стои во ревизорскиот извештај.
Поради сето ова, МЕПСО нема обезбедно имотни листови за 95 недвижни ствари со вкупна набавна вредност од 3.624.968.000 денари.
До моментот на ревизијата МЕПСО имал отпочнато постапка за само за еден линиски инфраструктурен објект, иако во повеќе наврати ја известувал Владата за состојбата со недвижностите кои не се евидентирани во катастарската евиденција.