Published: Tuesday, April 21, 2020 12:33
Раководството на Ракометната Федерација на Македонија (РФМ) одлучи да не ја користи финансиската поддршка за 13 свои вработени во спортската администрација за месеците април и мај во износ од 14,500 денари по вработен, согласно Уредбата на Владата од 4 април 2020 година.
„Ракометната Федерација на Македонија ќе ги задржи на своите работни места сите административци, а при тоа висината на нивниот личен доход, независно од одложувањето на сите ракометни активности, ќе остане иста како во месец февруари 2020 година. Со оглед на тоа дека тековните ракометни активности за март и април годинава се одложени поради здравствената криза, а за истите Федерацијата веќе имаше резервирано финансиски средства, Управниот одбор на РФМ одлучи тие средства да се донираат. Износот од 615.000 денари ќе биде уплатен на наменската сметка на Министерството за здравство за справување со здравствената криза предизвикана од вирусот ковид-19“, стои во објавата на РФМ на Фејсбук.
РФМ притоа апелира до целокупната македонска јавност за следење и најодговорно да почитување на препораките на Министерството за здравство преку нивните официјални канали на комуникација http://zdravstvo.gov.mk/korona-virus/ со цел побрзо да се вратиме на активностите кај нашиот спорт број 1 – ракометот.
„Би сакале да изразиме голема благодарност до сите здравствени работници во земјава, до медицинските сестри, хигиеничарите, продавачите на пазарите и во супермаркетите, фармацевтите и техничарите во аптеките, транспортерите, пекарите и сите останати кои во овие специфични услови придонесуваат за непречено опслужувањето на основните потреби на сите домаќинства. Ја користиме оваа прилика и да упатиме искрени желби за добро здравје до сите македонски граѓани“, се наведува во постот на РФМ на Фејсбук.