Инспирирани од Европската Унија (ЕУ), воспоставивме и создадовме средина во која граѓаните на земјите од Западен Балкан ќе можат безбедно да ги користат своите мобилни телефони за остварување на повици, за испраќање на пораки или за сурфање на интернет низ сите земји во Западен Балкан без дополнителни трошоци од 1 јули, порача министерот за информатичко општество и администрација, Јетон Шаќири во говорот на состанокот на министрите од шесте земји од Западен Балкан, одговорни за дигиталната трансформација и политиките за информациски и комуникациски технологии што се одржа во Подгорица, во организација на Советот за регионална соработка (RCC), „Heading towards Roaming Free Western Balkans“.
Шаќири нагласи дека ова е само почеток и додаде дека важноста на овој договор е исклучително голема и предуслов е за започнување на процесот за намалување на трошоците за роаминг и меѓу шесте земји од Западен Балкан и земјите од ЕУ.
– Меморандумите за 5G, интероперабилност и доверливите услуги, потпишани минатата година во Тирана, ја отворија вратата за изградба на заеднички технички јазик. Ова ќе овозможи на ИКТ системите ефикасно да комуницираат во регионот и во иднина, исто така, со земјите од Европската Унија. Тоа е мал, но важен чекор на патот кон градење дигитално општество засновано на доверба, рече Шаќири.
Најави и продлабочување на соработката меѓу овие земји, инвестиции во мрежа и инфраструктура, така што, посочи, квалитетот и брзината на комуникацијата ќе се зголемуваат уште повеќе.
– Мора да ја искористиме оваа можност и да го забрзаме напредокот кон поврзување на регионот. Ние мора да ги здружиме нашите напори и да работиме преку границите и преку секторите за заедничко зголемување на квалитетот на животот и забрзување на економското закрепнување на регионот, потенцира Шаќири.