Белгискиот државјанин Л.Д.С. склучил договор со Е.А. и Ф.Б. родители на 14-годишно девојче, да стапи во брак со неа, јави Министерството за внатрешни работи.
Во информацијата од МВР се наведува дека намерите на Белгиецот, биле за сексуална експлоатација на младата девојка која сеуште немала наполнето ни 14 години.
За да ја оствари својата намера да ја однесе малолетничката во Белгија, белгискиот државјанин чие полно име и презиме не се објавува, престојувал во Македонија во повеќе наврати. За да ја помине границата на девојчето му требале лични документи, за кои Белгиецот им дал на родителите, како што вели МВР, околу 2.500 евра, а во неколку наврати преку брз трансфер на пари Union“ од Белгија на Е.А. му испраќал парични средства во различен износ.
Полицијата ги фатила родителите и вчера со наредба на Основен кривичен суд Скопје е извршен претрес во нивниот дом во Струга каде што тие привремено престојувале. Притоа биле обезбедени докази за кривичното дело, додека пак Белгиецот Л.Д.С. бил фатен на Меѓународниот аеродром во Скопје, претресен и уапсен.
Вчера Националната единица за сузбивање на криумчарење мигранти и трговија со луѓе, до обвинителството поднесе кривична пријава против злосторничката тројка Л.Д.С. (38) од Белгија и Е.А. (33) и Ф.Б. (34) од Скопје, за сторено кривично дело „трговија со дете“. Денеска сите тројца ќе бидат распрашана и од судија.