Русија ќе протера 23 британски дипломати, како одговор на одлуката на официјален Лондон да протера исто толкав број на руски дипломати.
Москва, дипломатите ги прогласи за „персона нон грата“. Ќе биде затворено Конзуларното одделение на Велика Британија во Санкт Петерсбург и Британскиот совет во Русија. Дипломатите добија рок од една недела да ја напуштат Русија. Ова беше очекуван одговор од Русија, по протерувањето на руските дипломати од Велика Британија.
Ваквиот развој на настаните следува по нападот со нервен агенс врз агентот Скрипал и неговата ќерка Јулија. Британската премиерка Тереза Меј рече дека е „многу веројатно“ Русија да е одговорна за нивното труењето. Сергеј Скрипал, кој е поранeшен полковник во руската воена разузнавачка служба ГРУ, и неговата ќерка Јулија минатата недела беа најдени во критична состојба на клупа во градски парк во англискиот град Солсбери. Тие сега се в болница и се наоѓаат во кома, додека лекарите се борат за нивните животи. Се претпоставува дека тие се жртви на напад со употреба на нервно парализирачки гас.
Жртви на гасот беа уште 19 други лица и сите тие, освен еден полицацец кој истражувал на местото на настанот, се пуштени на домашно лекување.