Независниот руски канал ТВ Дожд (Rain) доби европска дозвола за емитување издадена од холандските регулатори и ја пресели својата база во Амстердам, откако дозволата што Латвија му ја даде во декември беше одземена.

Телевизиската станица, чијашто база во Москва беше затворена по руската инвазија на Украина, почна да се пренесува од ЕУ во јули. Меѓутоа, во декември, латвиските власти ја откажаа дозволата за емитување поради закани за националната безбедност.

Дозволата, објавена на непознат датум, ќе „обезбеди комерцијална телевизиска услуга преку програмскиот канал наречен „TV Rain“ во период од пет години од 22 декември 2022 година“, се вели во соопштението на холандскиот регулатор.

Дополнително, латвискиот јавен радиодифузен сервис LSM објави дека лиценцата ќе дозволи ТВ Дожд да емитува на сите кабелски мрежи во Холандија и другите земји на ЕУ, вклучително и Латвија.

Станицата објави соопштение на Твитер дека „ТВ Дожд ќе го пресели својот уреднички центар во Амстердам. Амстердамското студио ќе стане главно студио на каналот“. Сепак, ќе ги задржи канцелариите во Рига, главниот град на Латвија „бидејќи останува витална област за нас како дел од информативната стратегија на уредничкиот одбор“.

Теелвизијата Rain, или Дожд, либерална станица која беше означена како „странски агент“ од Кремљ во 2021 година, стана еден од многуте независни медиуми во Русија кои беа принудени да ги затворат своите врати по почетокот на војната против Украина.

Во март 2022 година, руските власти наредија исклучување на каналот. Тие го блокираа пристапот до нејзината веб-страница како дел од поголемата акција против новинарството, вклучително и криминализација на споделување „неофицијални“ информации за инвазијата на Москва, со казни до 15 години затвор.

Заедно со многу други, ТВ Дожд ги премести своите операции во странство, започнувајќи со емитување од неколку земји на ЕУ, вклучително и Латвија, во јули, повикувајќи се на „репресивните закони и воената цензура на Кремљ“.

Меѓутоа, во декември, латвиските власти објавија дека дозволата за емитување на каналот е откажана и дека ќе биде симната од емитувањето. Одлуката уследи по инцидентот во кој презентер на ТВ Дожд имплицираше дека станицата може да обезбеди помош за руските војници.

Извор: Еуроактив