Меѓународната криминалистичко-полициска организација, Интерпол, координациско тело за полиции од 192 земји, денеска треба да гласа за еден од двајцата кандидати кои се во трка за прв човек на организацијата, откако претходникот Менг Хонгвеи мистериозно исчезна во октомври откако замина за Кина, и постојат контроверзни информации за тоа што се случува со него. Кинеските медиуми подоцна соопштија дека Менг бил уапсен поради корупција и дека во седиштето на Интерпол испратил писмо со оставка.
Кандидати се привремениот претседател, Јужнокореецот Ким Џонг-јанг и Александар Прокопчук, полициски генерал од руското Министерство за внатрешни работи, кој последните седум години го води руското биро на Интерпол. Тој во моментов е еден од четирите потпретседатели на Интерпол.
По објавата на британски „Тајмс“ дека се очекува Прокопчук да биде избран за претседател на Интерпол, следуваа повеќе реакции, меѓу кои и четворица американски сенатори во отворено писмо побараа неговата кандидатура да биде отфрлена.
Британското здружение за човекови права „Фер судења“ (Fair Trials) испрати писмо до Интерпол во кое изразува силен протест против номинацијата на Прокопчук, со забелешка дека „не би било соодветно земја со историја на кршење на правилата на Интерпол да добие улога во раководството на клучната институција за надзор“.
Рускиот активист Владимир Кара-Мурза за „Вашингтон пост“ напиша колумна, во која наведува дека Москва честопати со политички мотивирани потерници, кои се испраќаат во други земји, заради прогон на политички неистомисленици и заради ограничување на нивното движење.
И покрај експлицитната забрана за „каква било интервенција или активност од политички, воен, религиозен или расен карактер“, организацијата ги прифати барањата на Кремљ за испраќање „црвени известувања“ против истакнати дисиденти, наведува Кара-Мурза. Тој предупредува дека кога рускиот претседател Владимир Путин ќе има свој човек на чело на Интерпол, веќе нема да мора да се обидува на измама да го користи системот на Интерпол за налози за апсење, туку ќе може организацијата директно да ја стави под своја контрола.
По ваквите реакции, Кремљ вчера го осуди, како што го нарече, „мешањето“ во изборот на нов претседател на Интерпол.