Она што во некои медиуми беше пренесено како исказ на Орце Камчев во делот на политичарите воошто не е точен, изјави денеска шефицата на Обвинителството за гонење организиран криминал Вилма Русковска. Таа негира дека било кој политичар бил споменат во исказот на Камчев како што објавија дел од медиумите наводно повикувајќи се на записникот од исказот што Камчев го дал кога ја поднел кривичната пријава.
-Станува збор за дезинформации на одредени медиуми. Заев е споменат само во делот каде што Јордан Камчев кажува дека пријавил и кај него. Ниту еден друг политичар не е споменат, кажа Русковска, откако пред Советот на јавни обвинители го презентираше досието за специјалната јавна обвинителка Катица Јанева во однос на предметот „Рекет“.
Во однос на истрагата за тоа како документот протекол во јавноста, Русковска кажа дека се уште трае и повтори дека адвокатите на Камчев и Камчев лично како сведок не го добил записникот од исказот.
-Записници за сведоци и за лица од кои се бараат известувања не им се доставуваат, ниту записници од примање кривична ппријава. Пред завршување на истражната постапка кога ќе се донесе известување за завршена истрага, тогаш препис се дава на одбраната и на осомничените, рече Русковска.
Русковска рече дека интензивно се работи и на финанисиската истрага. „За дел од парите знаеме каде завршиле, за другото се работи, но во оваа фаза на истрагата не можам да кажам во јавноста детали од истрагата“, рече Русковска.
Русковска потврди дека утринава во Обвинителството за организиран криминал, екс директорот на „Т мобиле“ Жарко Луковски побарал да го дополни исказот кој претходно го дал како сведок.
Русковска не кажа детали од исказот кој Камчев вчера го дал во Обвинителството, но рече дека добиле „дополнителни инфомации“.
Во Советот на јавни обвинители обвинителката го образложи случајот „Рекет“ и причините зошто Катица Јанева е во привор. Пред обвинителите таа ги презентирала сите докази кои до овој момент ги имаат за „Рекет“, изјавите што ги дале сведоците и пријавата што ја поднел Камчев.
Русковска нема информација каква е здравствена состојба на Јанева и дали адвокатскиот тим подготовува жалба на мерката притвор поради сериозно влошена здравствена состојба.
Советот на јавни обвинители се уште одлучува дали ќе покрене постапка за разрешувае на Јанева и за избор на в.д. обвинител на СЈО.