Министерот за економија на С. Македонија, Крешник Бектеши и министерот за животна средина и енергија на Грција, Костас Скрекас, денеска во Атина ќе потпишат Договорот за развој на интерконекцијата за пренос на природен гас, јави дописничката на МИА од Атина.
На вчерашниот редовен брифинг со новинарите, портпаролката на грчката Влада, Аристотелиа Пелони, рече дека Грција секогаш ја поддржува интеграцијатс на соседите од Западниот Балканот во Европската Унија, под поставените услови и „секогаш поддржува економски развој и регионална стабилност и преку билатерални договори“.
Во рамките на „25-та тркалезна маса со грчката Влада“ што оваа година е на тема „Од социјално дистанцирање до социјална солидарност“, премиерот Заев, претпладнево заедно со неговите колеги од Албанија и Косово, Еди Рама и Албин Курти, ќе дискутираат за зајакнување на соработката и солидарноста во Југоисточна Европа, за проширувањето на ЕУ, за трговијата и инвестициите како и за иницијативите за мир и подобро разбирање.
На панел дискусијата заедно со Заев, Курти и Рама (кој ќе се вклучи онлајн), ќе учествуваат и поранешната претседателка на Хрватска, Колинда Грабар-Китаровиќ, претседателка на мрежата „Диктио“ и поранешната европска комесарка Ана Дијамантопулу, пратеникот од СИРИЗА и поранешен министер за надворешни работи Јоргос Катругалос, како и поранешниот претседател на Републикански национален комитет, Рајнс Прибес.
Синоќа, се одржа свечената гала вечера на конференцијата на која се обрати грчкиот премиер Киријакос Мицотакис, а присуствуваше и премиерот Заев, како и министерот за внатрешни работи на Грција, Макис Воридис, министерот за туризам на Грција, Харис Теохарис, поранешниот претседател на ЕП, Мартин Шулц, потпретседателот на ЕК, Маргаритис Схинас, поранешната претседателката на Хрватска, Колинда Грабар-Китаровиќ, поранешниот француски премиер Доминк Де Вилпен, амбасадорот на САД во Атина, Џефри Пајат, како и бројни дипломати, бизнисмени, стопанственици.