Властите во Вашингтон одлучиле да ја преименуваат улицата каде што се наоѓа руската Амбасада и таа да го носи името на убиениот руски опозициски политичар Борис Немцов.
Одборот за преименување на улицата вели дека одлуката на ваков начин да му се оддаде почест на убиениот демократски активист е донесена едногласно, објави Би-би-си.
Владимир Жириновски, лидерот на националистичката ЛДПР партија, го нарече овој потег „валкан“.
Со него се согласи и членот на Комунистичката партија на Русија, Дмитри Новиков, кој изјави дека американските власти премногу се мешаат во руските внатрешни работи.
Немцов, кој беше истакнат критичар на рускиот претседател Владимир Путин, беше застрелан во февруари 2015 година додека се враќал дома од еден ресторан во Москва.
Неговата ќерка Жана допатувала на почетокот на декември во Вашингтон за да се заложи за промената на името.
-Актуелниот руски политички режим сака да ги избрише сеќавањата на мојот татко затоа што исправно веруваше дека симболите се важни и дека потенцијално можат да поттикнат и инспирираат промени, изјави таа пред Собранието.
Поради убиството на нејзиниот татко биле осудени петмина Чеченци, но неговото семејство и поборници веруваат дека личноста која го нарачала тоа злосторство и понатаму е на слобода.