Соединетите Американски Држави планираат да инвестираат милијарди долари за проширување на капацитетите за производство на вакцини против ковид-19 за да имаат најмалку една милијарда дози до втората половина на наредната година, пишува „Њујорк тајмс“, повикувајќи се на Белата куќа.
Најавата доаѓа во момент кога администрацијата на Џо Бајден се соочува со притисок од активисти да ја зголеми понудата на вакцини за посиромашните земји.
Инвестицијата во производството на вакцини е дел од приватно-јавното партнерство за да се задоволат потребите од вакцини и локално и ширум светот, а исто така е подготовка и за идни пандемии, изјавија доктор Дејвид Кеслер, кој ја надгледува дистрибуцијата на вакцините, и Џеф Зиентс, кој ги координира активностите на Белата куќа во врска со коронавирусот, за „Њујорк тајмс“.
Се проценува дека овој план ќе чини неколку милијарди долари и ќе биде платен со средства од американскиот План за спасување, кој Бајден го потпиша во март.