САД нема директно да преговараат со сирискиот претседател Башар ал-Асад, изјави денеска американската амбасадорка во ОН, Ники Хејли.
– Нема да имаме директни преговори со Асад, изјави Хејли во интервју за телевизијата Си-Би-Ес, нагласувајќи дека Сирија не е толку вредна за да разговара директно со Вашингтон.
Таа ги обвини сириските власти дека досега одбивале да учествуваат во мултилатералните преговори организрани во рамки на политичкиот процес за надминување на кризата во земјата, што се одвива под покровителство на ОН, при што нагласи дека Русија треба да ја „донесе Сирија“ на преговарачката маса.
Хејли претходно во интервју за телевизијата Фокс изјави дека САД нема да ги повлечат своите војници од Сирија се додека не остварат три цели.
Таа нагласи прва цел на САД во Сирија е да добијат гаранции дека хемиското оружје нема да се користи на начин што би ги загрозувал американските итереси, втора – целоно да биде поразена групата Исламска држава и трета – да се создаде добра позиција за следење на активностите на Иран.
– Наша цел е американските сили да се вратат дома, но нема да си заминеме се додека не бидеми сигурни дека сме ги оставриле овие три работи, изјави Хејли.
24 часа по нападите, Франција, САД и Велика Британија во Советот за безбедност на ОН претставија нацрт резолуција за Сирија во која е вклучено формирање нов механизам за истраги за употреба на хемиско оружје, јави АФП повикувајќи се на дипломатски извори. Преговорите за текстот, редактиран од Франција почнуваат утре. Датум за гласање не е наведен со цел „Париз да даде време за вистински преговори“, наведува изворот.
За првпат во СБ на ОН се предлага текст во кој се обединети три аспекти на проблемот – политички, хуманитарен и хемиски. Целта не е да се промени управувањето со државата туку да се покаже дека западната воена интервенција во Сирија „и служи на политичката стратегија“, нагласува дипломатот.
Евентуални нови ракетни напади врз Сирија би предизвикале хаос во меѓународните односи, оцени денеска рускиот претседател Владимир Путин во телефонски разговор со неговиот ирански колега Хасан Рохани.
Како што соопшти Кремљ, Путин и Рохани размениле мислења за состојбата во Сирија по вчерашните напади на САД, Велика Британија и Франција врз објекти на сириските власти, како и за „вкупната ситуација на Блискиот Исток, случувањата во Јемен и за понатамошниот развој на руско-иранската соработка и зајакнување на меѓусебните врски во трговско-економската сфера“.
Во соопштението се нагласува дека двајцата лидери се согласиле оти вчерашната „илегалната акција“ на трите западни земји има негативно влијание врз шансите за изнаоѓање политичко решение за кризата во Сирија.
– Владимир Путин посебно нагласи дека ако продолжат таквите акции, со кои се крши Повелбата на ОН. неизбежно ќе биде предизвикан хаос во меѓунардоните односи, се истакнува во соопштението на Кремљ.
Шефот на британската дипломатија Борис Џонсон изјави дека Лондон заедно со сојузниците ќе ги разгледа сите опции, ако сирискиот претседател Башар ал Асад повторно употреби хемиско оружје против своите граѓани во Сирија.
– Не постои ниту еден предлог на маса во овој момент за понатамошни напади, бидејќи до сега, фала на господ, режимот на Асад не е толку луд да преземе уште еден напад со хемиско оружје, наведе Џонсон.
САД, Велика Британија и Франција вчера истрелаа над сто ракети врз цели во Сирија, како како одговор на наводниот минатонеделен напад со хемиско оружје во Дума, при што загинаа најмалку 40 луѓе.