Република Северна Македонија мора да продолжи со реформите и евроинтегративниот курс, додека нејзините граѓани треба да ги осудуваат деструктивните сили кои имаат за цел да ја насочат земјата во правец на проруска ориентација. Ова е заклучокот на познавачите на политичките збиднувања во земјава, анализирајќи ги за „Фронтлајн“ повиците на Стејт Департментот на САД, како и на пријателите на Македонија од меѓународната заедница, дека земјата треба да продолжи со реформите и својот пат кон ЕУ.
– Кога едноставните работи се усложнуваат со манипулации и лаги резултатот е тој што го гледаме со години во Македонија. Почнатите преговори со ЕУ по успешниот скрининг треба да продолжат по одлуката на Собранието за уставни промени. Ако не се донесе таква одлука станува неизвесно кога тоа ќе се случи бидејќи релевантни политички партии за тоа немаат навестување, ниту некоја поцврста определба. Ова е таа едноставна ситуација со едноставно решение. Сведоци сме како со години се одбегнува да бидат донесени одлуките за европеизација на Македонија. Притоа се вади милитантен арсенал со кој се алармира јавноста за предавства и распродажба на националните интереси, на македонскиот идентитет, на јазикот, на историјата, се тврди дека никогаш нема да влеземе во ЕУ, што сè заедно предизвикува голема конфузија кај граѓаните. Тоа е сеење на отров што кај голем број граѓани предизвикува слепило да не се видат јасно работите, вели за „Фронтлајн“, Ерол Ризаов – новинар и политички аналитичар.
Или, додава тој, еве го едноставното објаснување што значат преговорите. „Ништо друго освен спроведување во практиката на сè она за што меѓусебно се обвинуваат со децении големите партии“.
– Тука се воспоставување на: правосуден систем како што прилега на демократска држава; независно судство; владеење на правото; сведување на криминалот и корупцијата на едно ниво кое не дозволува јадење на супстанцата на државата; успешни економски реформи; праведен даночен систем; подобро образование и здравство; повисок стандард на населението; слободни медиуми; повисока еколошка свест; ефикасна администрација; современо земјоделство; изградба на комплетна инфраструктура и уште многу реформи предвидени во над 30 поглавја кои треба да се реализираат за 5, 10, 15 години, зависи од нас. Тоа за Македонија објективно е можно за шест до седум години ако има меѓупартиски консензус да се мери успешноста на секоја влада според тоа колку од овие реформи остварила, нагласи тој.
Според него, пред избори треба да се излезе на чистина кој за што е.
– Има сериозни сили во Македонија и во партиите и во деловниот свет и во науката кои се против членството на Македонија во ЕУ, или попрецизно кажано – против европеизација на Македонија. Тие јавноста треба да ги препознае и на изборите да ги казни. Само така може да се отвори патот кон европските вредности. Победата на тие кои се на погрешната страна на историјата води кон распад на државата, подвлече Ризаов.
Исмет Рамадани од Евро-Атлантскиот Совет на Македонија за „Фронтлајн“ вели дека уставните измени остануваат како задача на политичките субјекти после изборите.
– После изборите се подразбира дека тоа ќе го направат тие кои ќе понудат пред гласачите јасна и аргументирана опција дека ќе ги изгласат уставните измени и ќе го деблокираат патот кон членство во ЕУ. Се разбира дека мора да се продолжи ефикасно со реформите, во судството, здравството, образованието и борбата против корупцијата и криминалот. Веќе е јасно кој од политичките чинители каде се наоѓаат со нивните стратешки опции, а тоа треба да го докажат со конкретна програма и визија. Граѓаните за наредните избори уште сега знаат кои се субјектите кои јасно се определени за евроатланската опција и ќе ја донесат конечната одлука на денот на изборите кога ќе се избистри разликата меѓу тие кои нудат јасна перспектива и тие кои сеат магла за да бидат изманипулирани, потенцира Рамадани.
Од друга страна САД ја охрабруваат Владата на Северна Македонија да ги преземе сите можни мерки за да се постигне најдобрата можна иднина на земјата, изјавија од Стејт департментот за МИА.
– Ова вклучува реформи во судскиот, здравствениот и образовниот сектор, со што ќе се поплочи патот за целосна интеграција во ЕУ. Се надеваме дека на претстојните избори гласачите ќе бараат транспарентност и одговорност од избраните лица и ќе побараат посилна, подобра и попросперитетна земја која ја заслужуваат, изјави портпарол на Стејт департментот.
Државниот секретар Ентони Блинкен и помошникот државен секретар на САД за Европа и Евроазија, Џејмс О’Брајан при неодамнешната посета на земјата укажаа на тоа кој е патот за напредок на Северна Македонија.
Дестан Јонузи / Frontline