По комплетирање на сите документи, ќе се формира комисија ако има потреба и ако има сомнеж за некој детаљ, па потоа ќе дадам дефинитивна изјава, истакна денеска министерот Сали.
Извештајот на Државниот санитарен и здравствен инспекторат (ДСЗИ) за случајот со хрватскиот ракометар Денис Тот е доставен во мојата канцеларија, сега чекаме извештај од судска медицина. По комплетирање на сите документи, ќе се формира комисија ако има потреба и ако има сомнеж за некој детаљ, па потоа ќе дадам дефинитивна изјава, истакна денеска министерот за здравство Беким Сали.
Тој вели оти „сликата сѐ уште не е комплетирана“, па поради тоа не може да даде прецизен одговор во однос на тоа дали има некој лекарски пропуст во овој случај.
– Не би сакал во период кога се уште е отворен процесот да дадам некоја изјава. Сѐ уште сликата не е комплетирана, не можам да дадам прецизен одговор, меѓутоа гледам дека секоја институција својата работа си ја обавува во рамки на своите ингеренции. И со директорката Мојсова и со директорката Букова сме разговарале, меѓутоа дозволете да заврши процесот, па да кажеме, додаде Сали.
Како што вчера објавивме , обдукцискиот извештај за причините за смртта на 28-годишниот ракометар на РК Бутел, Денис Тот, се уште не е комплетно завршен, се чекаат токсиколошките и хистопатолошките анализи, изјави за НоваТВ проф. д-р Александар Станков, директор на Институтот за судска медицина и криминалистика во Скопје, каде се вршеше обдукција на хрватскиот ракометар Денис Тот, кој почина во петокот на Клиниката за анестезија, реанимација и интензивно лекување (КАРИЛ) откако беше претепан до смрт во четвртокот изутрина пред дискотеката „Привилиџ“ во Градскиот парк во Скопје.