Министерот за здравство Венко Филипче вели дека Владата донела одлука за отворање на границите од повеќе причини. Прво затоа што R0 факторот за пренос на вирусот неколку денови бил под единица, дека многу мал дел од лицата во карантин или во самоизолација по влез во земјава развиле симптоми, како и поради тоа што Северна Македонија била единствена во регионот со затворени граници. Во меѓувреме, потенцира, се бара правна форма како да се ослободат од карантин или самоизолација сите лица кои изминатите денови влегоа во земјава.
„Ние во континуитет, според наши анализи, од 20 – 21 јуни имаме R0 фактор под единица, што сметаме дека е добар тренд. Сите овие анализи и бројки во смисла на предвидување ќе ги кажам со резерва, бидејќи секогаш има можност да се случи некое жариште кое е неочекувано и не сме го предвиделе. Ние сме една од ретките земји во регионот која имаше затворени граници и во таа смисла беше препораката границите да се отворат“, рече Филипче на денешната прес-конференција.
Тој додаде дека многу мал процент од тие упатените лица во карантин или во самоизолација развиле симптоми. Тоа, потенцира министерот, се неколку десетици граѓани од илјадници кои беа изолирани во карантините.
„Во моментот се бара правна форма со која луѓето кои сега имаат решение за изолација и ги минале границите ќе се ослободат од изолацијата и од државен карантин. Правниците два дена интензивно работат на тоа поле и се блиску до решение“, рече министерот за здравство.
Филипче вели дека притисокот кон болниците не е таков каков што бил на почеток. Според него, има нешто помал број приеми во однос на бројката од минатата недела, но, како што потенцира, во исто време почнале и одреден број пациенти да се испишуваат.
„Димензионирањето на мерките и нивна имплементација зависи од капацитетот на болниците, увидот од тоа кои се заболени и кои се контактите, точноста на податоците и во таа смисла се и мерките на ослободување што ги препорачуваме со соодветни протоколи. Ова е ставот на комисијата. Будно се следи епидемиолошката слика и секако е дека е можно да се интервенира со некои мерки во одредени региони или населба, но во овој момент нема индикација да се прави некоја таква дополнителна мерка“, истакна Филипче за можноста за воведување на нови мерки.