Двата синдикати за задравство се договорија со претставниците на министерот за здравство Фатмир Меџити за зголемување на платата. На денешната средба потпишаа анекс на колективниот договор и зголемување на платите. Медицинските сестри ќе добијат 3000 денари зголемување, а останатите вработени во здравство 2.000 денари. Покачувањето ќе важи од март месец, а за официјализација се чека одобрувањето од министерство за финансии и министерот Фатмир Бесими.
„Се договоривме. По три илјади денари за сите сестри и по две илјади денари за сите останати од помошно-технички персонал, администрација, доктори, сите вработени во здравството да имаат бруто покачување со мартовската плата“, изјави Предраг Серафимовски, потпретседател на Синдикатот на Клинички центар по состанокот со заменик министерката за здравство и шефот на Кабинет на министерот за здравство.
Серафимовски рече дека и од Министерството за здравство треба да излезат и да ги потврдат овој договор.
Инаку, членови на двата синдиката, денеска одржаа протест пред Министерството за здравство.
Иако задоволни од денешниот договор, синдикатите велат дека и во наредниот период ќе продолжат со нивните нови барања, заради инфлацијата.
„Со притисок се успеа да се дојде до изнудување на потпишување на анексот на Колективниот договор за здравствена дејност“, рече претседателот на Самостојниот синдикат за здравство, фармација и социјална заштита, Љубиша Каранфиловски. Тој, заедно со потпретседателот на Синдикатот на Клинички центар Предраг Серафимовски беа на состанокот со заменик министерката за здравство и шефот на Кабинет на министерот за здравство.
Каранфиловски рече дека со неговото непотпишување ќе се доведеле во ситуација 11 илјади вработени во здравството да бидат изедначени со минималната плата.
Синдикатите минатата недела најавија протест за денеска пред Министерството за здравство кое ги повика на состанок неколку часа пред најавениот протест и по средбата кажаа дека постигнале договор.