По освоениот сет против Финска, двата максимални пораза од Турција и од Русија, дојдоа две победи. Македонските одбојкари се издигнаа како Триглав, се одважија како да се бранители на титулата, го потиснаа притисокот, се растоварија од секаков императив, излегоа на терен да уживаат, заиграа слободно, а тоа им донесе резултат во последниот настап во групата Ц на Европското првенство. Во арена „Стожице“ ја совладаа и Словенија со 3:1 (по сетови: 26:24, 30:28, 19:25, 26:24), па дали ќе продолжат во осминафинале во Франција или не, ќе зависи од турските репрезентативци од кои ќе очекуваат победи против Белорусија и против Финска и да ги повлечат во топ 16.
Најефикасен играч во македонската репрезентација и овојпат беше Никола Ѓорѓиев. Капитенот повторно забележа преку 30 поени и за среќа имаше поддршка и од останатите. Свој ден во Љубљана имаа и Александар Љафтов, Владо Милев, одличен во блоковите беше Ристо Николов, солиден беше приемот на Дарко Ангеловски, стандардно константен беше Филип Деспотовски. Селекторот Никола Матијашевиќ одлично го водеше тимот од клупата, реагираше со тајм аути кога ќе почувствуваше дека е можен пад во играта или пак противникот влегува во серија за што ја користеше и можноста да побара челинџ за смирување на „црвено-жолтите“, но и за деконцентрација на словенечките одбојкари.
Ова беше само втора победа на С. Македонија во седмата одбојкарска пресметка со Словенија.
Македонските одбојкари по пет одиграни мечеви се трети во групата со биланс од две победи и три порази. Вечерва играат уште Турција и Белорусија, а групата ќе биде комплетирана во текот на утрешниот дел со мечевите меѓу Словенија – Русија (17.30 ч.) и Финска – Турција (20.30 ч.).