Пратениците ги донесоа законските измени со кои ДДВ-то за струјата се намалува од 18 на 5%. За овие измени 83 пратеници гласаа „за“, а немаше ниту еден против.
Сепак, носењето на ова законско решение доцни, бидејќи ДДВ-то на струјата требаше да биде намалено уште од 1 јули за да се амортизира ударот од поскапата цена на електрична енергија за околу 12%.
На сметките на граѓани данок од 5% ќе им се пресметува, дури откако законското решение ќе биде објавено во „Службен весник“. Ова значи дека за месец јули сметките за струја ќе бидат повисоки затоа што за претходниот период ќе биде тарифирана повисоката цена на електричната енергија, но без намалување на ДДВ-то.
Законското решение денеска го поддржаа и од опозициските партии. Тие ја искритикуваа власта дека само предизборно ги манипулира граѓаните, а догодина ДДВ-то ќе се искачи на 10% и ќе се плаќаат повисоки сметки за електрична енергија. За разлика од нив, власта убедуваше дека ова законско решение е добро и ќе овозможи амортизација. Ова решение беше предлог на Министерството за финансии.
Според усвоените измени, идната година, од 1 јули 2022 до 30 јуни 2023 година ќе се применува повластена даночна стапка од 10 проценти за прометот на електричната енергија кон домаќинствата.
Законските измени со кои се намали ДДВ-то на струјата ги поздрави Регулаторната комисија за енергетика.
– РКЕ ќе продолжи да креира иницијативи кои треба низ соодветен институционален пат да донесат решенија за заштита на животниот стандард кога се во прашање потрошувачите, што практично се покажа и со денешното носење на законските измени кои потекнаа од нашата иницијатива што ја покренавме пред една година, со кои се намалува ДДВ-то за електрична енергија за домаќинствата, соопштува претседателот на РКЕ Марко Бислимоски во пишана изјава.
Тој апелира сега фокусот да се насочи кон проширување на опфатот на ранливи категории – кои треба да бидат сет на прецизно идентификувани категории на домаќинства на кои им е потребна парична помош со која ќе се намалат сметките за електрична енергија, како што се пензионерите кои се во категоријата на најниски пензии.