Успешна смена на генерации, „прошетка“ низ Д дивизијата во фудбалската Лига на нации, пласман во Ц конкуренцијата, полуфинале против Косово и одличен вовед во квалификациите за Европското првенство во 2020 година. Сите овие факти беа доволна причина за Фудбалската федерација на Македонија за продолжување на соработката со Игор Ангеловски за дополнителни 12 месеца. Договорот што го има селекторот во моментот беше со рок на важност до ноември месец оваа година, а со новиот ќе остане на клупата на националниот тим до крајот на наредната.
„Репрезентацијата ми е многу поважна од селекторското место. Нема ништо посвето од водење на националниот тим, а со вакви момци и асистенти, задоволството е комплетно. Задоволен сум од постигнатото во изминатиот период за што најзаслужни се играчите, но тоа нема да нè задоволи. Ќе се стремиме да бидеме уште подобри во тешките предизвици што нè очекуваат за остварување на заеднички посакуваната цел која се однесува на пласман на големо натпреварување“, рече Игор Ангеловски.
Кормилото на националниот тим го презеде во октомври во 2015 година и оттогаш на негова страна се цврсти аргументи за укажување на доверба да остане на функцијата. Пет победи и пораз во Лигата на нации, позитивни резулати во пријателските мечеви, позитивна атмосфера во репрезентацијата, победи и реми во квалификациите за ЕП 2020.
„Со игрите и резултатите во изминатиот период, Игор Ангеловски ја оправда укажаната доверба и потврди дека Управниот одбор направил правилен избор за селектор. Имаме заеднички интерес, а тој е успех на македонската репрезентација. Како Федерација че овозможиме максимални услови за работа и подготовки во насока на остварување на резултатите што ги посакуваме. На сите ни е јасно дека единствено добар резултат е мерило за успех“, порала Мухамед Сејдини, претседател на ФФМ.
Македонската репрезентација е пред два исклучително важни натпревара на домашен терен во групата Г во квалификациите за ЕП 2020. На 7 јуни во Скопје ќе гостува селекцијата на Полска, а три дена подоцна и Австрија. По две одиграни кола, националниот тим има победа над Летонија (3:1) и реми со Словенија (1:1).