Новак Ѓоковиќ нема да ја брани титулата на АТП турнирот во Доха што требаше да претставува генерална проба за српскиот тенисер за Австралија опен. Состојбата со неговиот повреден лакт е непроменета од последните неколку дена поради што беше принуден да се повлече и од егзибициите во Абу Даби.
„Нема подобрување од деновиве. Сè уште чувствувам болка. Затоа сум принуден да се повлечам од Доха, турнир што беше прогласен за најдобар во серијата 250 во 2017 година“, објави Ѓоковиќ на својата интернет страница.
Србинот изрази жалење што не е во можност да се појави пред публиката во Катар од каде носи прекрасни спомени, но потенцира дека одлуката ја донел во консултација со медицински тим за спречување евентуално влошување на ситуацијата.
„На терен ќе се вратам кога ќе бидам стоотсто подготвен. Се надевам дека тоа ќе биде наскоро“, додаде тој.
Ѓоковиќ триумфира во Доха во 2017 година по победата во финалето над Енди Мареј со 6:3, 5:7, 6:4.