Младите погони во фудбалската Академија на Ливерпул ќе бидат прва станица во тренерска кариера на Стивен Жерар. Поранешниот англиски репрезентативец, речиси, сиот свој играчки стаж го мина на „Енфилд“ со исклучок на последните 18 месеци кога настапуваше за Лос Анџелес Галакси во американската МЛС лига.
„Го затворив кругот и се вратив на местото на кое почнав. Одлуката не е емотивна туку ја донесов бидејќи верувам дека можам да помогнам на мојот клуб. Ќе имам извонредна прилика да учам и напредувам како тренер. Истовремено ќе можам да пренесам искуство и идеи на младите играчи во важен период од нивниот развој“, рече Жерар.
Жерар постигна 185 гола за Ливерпул во 710 одиграни натпревари. Со екипата има по една титула во Лигата на шампиони и во Лига Европа, две во ФА купот и три во Лига купот. За репрезентацијата на Англија заигра во 114 средби и даде 21 гол.