Мендух Тачи е реизбран за претседател на ДПА на седмиот Конгрес на партијата што се одржа денеска во Тетово. Тој пред присутните истакна дека ДПА во периодот што следи ќе се залага за имплементација на Договорот за името со Грција кој, како што рече, е основен услов за Македонија да се интензивира во евроатлантските интеграции.
„Договорот со Грција е многу важен за Албанците затоа што сме ние и за ЕУ и за НАТО. Сега во Македонија многу луѓе велат и мислат дека договорот нема да помине. Јас само можам да им порачам да бидат мирни затоа што овој Догвоор ќе помине со оглед на фактот дека тој е најголемата капитална инвестиција на државата, а ние сме на границата на егзистенција и само со него односно со влез во ЕУ и НАТО може да опстанеме“, рече Тачи.
Тој смета дека Албанците сè уште ги немаат остварено основните права, пред се, во економска смисла, затоа што, според него, одлуките во државата не се донесуваат консензуално, нема рамноправна распределба на буџетот, а општините се децентрализирани во политичка, а не и во фискална смисла.
„Многу албански граѓани гласаа за СДСМ односно за македонска партија. Јас сега ќе ги прашам дали живеат тие подобро. Не, Албанците во економска смисла живеат многу лошо. И можеби како Албанци имаме индивидуална благосостојба, но немаме колективна благосостојба. Бадијала ќе ни биде интегрирањето во евроатлантските структури ако во државата немаме консензуален начин на донесување одлуки, како што е и во ЕУ“, рече лидерот на ДПА, Тачи.
За време на седмиот Конгрес се избра и ново претседателство на партијата. Именувани се пет нови потпретседатели, Имер Алиу е избран за нов генерален секретар на партијата, а Илјаз Халими за претседател на Централното собрание.
Беше изгласана и резолуција на паратијата која во себе има неколку точки, пред се, за побрзо членство на Македонија во ЕУ и НАТО и целосна еднаквост на Абланците во системот преку механизам на целосен конзензус во донесување на одлуките.