Потпретседателот на Собранието на РМ и пратеник од НСДП, Горан Мисовски, денеска изјави дека е постигната согласност меѓу власта и опозицијата за составот на ДИК и законските решенија што беа договорени на лидерската средба, и оти тие најверојатно во сабота ќе бидат донесени на собраниска седница на која ќе биде распишана и одлуката за референдумот.
– Не очекуваат клучни моменти за иднината на Република Македонија. Имаме усогласени предлози. Дајте да ја избереме ДИК, да ги донесеме тие три закони за кои веќе имаме согласност дека координаторите ги потпишале, да ги ставиме во процедура и да го утврдиме референдумското прашање, рече Мисовски на седницата на Комисијата за надворешни работи во делот на процедуралните дискусии.
Рече дека потоа секој ќе може да ја води кампањата за референдумот. Ќе изнесе свои ставови за и против Договорот со Грција.
Пратеничката група на опозициската ВМРО-ДПМНЕ претпладнево до кабинетот на претседателот на Собранието, Талат Џафери конечно ги доставила предлозите за членови на ДИК од нивната партија.
Со ова се очекува да се одблокира процесот за избор на составот на ДИК.
Кабинетот на Џафери формалните известувања од политичките партии за предлозите за членови на ДИК ќе ги достави до претседателот на Комисијата за прашања на изборите Илија Димовски.
Димовски за МИА изјави дека седницата на Комисијата ќе ја закаже веднаш штом ќе ги добие материјалите од претседателот Џафери.
Партиите неофицијално во јавноста веќе ги соопштија кандидатите за членови на ДИК, новиот состав што треба да го организира есенскиот референдум за името по Договорот со Грција.
СДСМ ги предлага Борис Кондарко, Јанаки Витановски и Радица Ристевска, а ВМРО-ДПМНЕ Оливер Дерковски и Елизабета Постоловска, ДУИ ја предложи Дитмире Шеху, додека БЕСА излезе со предлогот Енвер Салиу.
Претседател на комисијата ќе биде Дерковски од опозициската ВМРО-ДПМНЕ, имајќи предвид дека консензуалниот договор на партиите беше овој привремен состав на ДИК да се бира по стариот модел со партиски претставници. За овие членови на ДИК треба да гласаат две третини од пратениците.