Седум недели по Брегзит и еден месец пред поднесување на годишниот Буџет до Владата, британскиот министер за финансии, Саџид Џавид поднесе оставка. Портпаролот на Министерството ја потврди одлуката на Џавид која доаѓа во период кога премиерот Борис Џонсон започна со реконструкција на својот Кабинет.
Џонсон, кој најави дека ќе формира тим за реализација на неговата визија за Велика Британија по Брегзит, денеска разреши и четворица министри, пишува британскиот весник „Лондон Ивнинг Стандард“.
„Благодарност“ за досегашниот ангажман е искажана на министерот за Северна Ирска, Џулијан Смит што, како што пренесуваат британските медиуми, е изненадувачки потег со оглед на пофалбите што ги доби за неговата улога во решавање на тригодишната криза, период во кој покраината беше без влада и парламент. Како што пренесува „Би-Би-Си“, премиерот Џонсон ги разреши од должност и Андреа Ледсом и Естер Меквеј, министерки за бизнис и за домување, како и министерката за животна средина, Тереза Вилерс. Воедно побарана е оставка и од државниот обвинител Џефри Кокс.
Ова е прва голема реконструкција на Владата на Џонсон по победата на изборите во декември во 2019 година. Покрај направената чистка, тој треба да именува и претседател на Конференцијата за климатски промени на Обединетите нации што ќе се одржи во ноември во Глазгов. Планирањето на настаните започнаа со минатонеделното отпуштање на министерката Клер О’Нил која беше задолжена за организација.
Како што пренесуваат светските агенции, конзервативната администрација на Џонсон сега се соочува со уште еден голем предизвик, бидејќи до крајот на годината треба да постигне трговски договор со ЕУ.