Само неколку часа откако американскиот претседател Доналд Трамп на Твитер порача дека „разговорот не е одговор“ за решавање на проблемот со ракетните проби на Северна Кореја, секретарот за одбрана Џејмс Матис изрази спротивставено мислење.
Тој на состанокот во Вашингтон со министерот за одбрана на Јужна Кореа Сонг Јунг Мо рече дека Соединетите држави никогаш не биле надвор од дипломатските опции.
-Не, ние никогаш не сме надвор од дипломатски решенија, ние продолжуваме да работиме заедно, а министерот и јас ја делиме одговорноста да обезбедиме заштита на нашите народи, на нашето население и на нашите интереси, рече Матис.
Во меѓувреме, шефот на руската дипломатија Сергеј Лавров побара од Соединетите држави да се воздржат од воена акција против Северна Кореја.
Тој имал телефонски разговор со американскиот државен секретар Рекс Тилерсон. Лавров, како што соопшти руското министерство за надворешни работи, му рекол на Тилерсон дека секаква американска воена акција против Северна Кореја ќе биде „полна со непредвидливи последици“.
Претходно, претседателот Доналд Трамп исклучи секакви дипломатски преговори со Северна Кореја, порачувајќи дека Соединетите држави 25 години разговараа со Северна Кореја и оти „разговорот не е одговор“.
Тој исто така му порачал на Тилерсон дека евентуални натамошни санкции врз Северна Кореја ќе бидат контрапродуктивни. Јапонија по лансирањето на ракетата врз нејзинот северен остров Хокаидо побара дополнителни санкции врз Северна Кореја.
Советот за безбедност во вторникот на итната седница го осуди Пјонгјанг, но не побара нови санкции.
Во вторникот Северна Кореја лансира ракета која може да носи нуклеарна боева глава, и беше директно насочена над Јапонија. Според експертите ова претставува најголемата провокација досега и е забрането според меѓународното право.