Лидерот на ДР-ДПА, Зијадин Села по средбата во хотелот Арка изјави дека ќе дадат потписи за мандат на лидерот на СДСМ, Зоран Заев, но тоа не значело поддршка за Влада.

Тој додаде дека денеска парламентарните партии на Албанците дебатирале за декларацијата на Албанците и како понатаму ќе се одвиваат средбите.

„Во иднина овие средби треба да се држат во Собрание. Дебатиравме околу законот за Албански јазик. Закон кој ќе биде предложен од ова тело, работиме на предлог кој ќе ги задоволува потребите на Албанците, рече Села.

Тој смета дека треба да се отвори Уставот бидејќи во него има многу недоследности.

„Ова е неприфатливо од македонските партии, иако многу земји повеќе пати го менувале Уставот“, рече Села.

Лидерот на ДУИ, не одговори на прашањата на новинарите.

Од движењето БЕСА, пак, кои не учествуваа на денешната средба рекоа дека не гледаат никаква обврска да учествуваат на состаноци кои не се во духот на заедничката Декларација на албанските партии. За нив, денешната средба била само билатерален состанок меѓу две албански партии во Македонија.

„Движењето БЕСА стои на ставот дека и покрај тоа што некои политички експоненти – на инфантилен начин – ја присвоија Декларацијата, сепак Движењето БЕСА ќе продолжи да ја поддржува Декларацијата и кога овие точки ќе дојдат во Собранието на Република Македонија, нашите пратеници ќе ги поддржат истите“, пишува во соопштението на БЕСА.