Лидерот на Алијансата на Албанците Зијадин Села не верува дека има шанса да се вратат во Владата, но сепак остава простор и за поинаков начин да се одвиваат работите, бидејќи како што вели „во политиката никогаш не постои не“.
-Не верувам дека таква шанса ќе има, бидејќи се работи за достоинство. Никогаш не сме дозволиле некој да се игра со нас, нема да дозволиме тоа пак да се случи. По политиката никогаш не постои – НЕ, но од друга страна во вакви околности не, вели Зијадин Села во неделното интервју на Радио Слободна Европа.
Во врска со Законот за употреба на јазиците и реакциите во јавноста за начинот на којшто беше донесен, но и во однос на содржината од дел од експертската јавност, Села вели дека работите сепак не се онакви какви што се претставуваат во јавноста.
-Зборуваме дека законот е донесен без дебата што не е вистина. Можноста за дебата во врска со законот имале сите. Забораваме дека во 2008 беа донесени над 100 закони, меѓу кои и законот за употреба на јазиците од страна на истите политички актери кои сега се спротивставија на законот и кои бараа да има јавна дебата. Паметите во 2008 како се донесе законот? Значи ова беше непотребна реакција од нивна страна. Ова е само играње политики и патриотизам пред народот, а не им е тоа целта, бидејќи истите политички актери, јас многу добро сум информиран, кога беше во прашање да се формира ново мнозинство го прифатија истиот закон и не се согласуваа само со Специјалното јавно обвинителство. Значи се работи само за театар, за ништо друго. Овој закон за волја на вистината требаше да се донесе во 2004 година кога требаше да се исполни законската рамка на Охридскиот рамковен договор, значи доцниме 14 години. Законот за употреба на јазиците е многу важен закон за албанското општество тука во Република Македонија и мислам дека не треба да се дели дали е тоа дел од реформите или не е дел од реформите. Дел од реформите е почитување на елементарните права на граѓаните, употребата на јазикот е елементарно право на секој граѓанин. Изјавите на некои, како што тврдите вие, претставници на амбасади мислам дека се неодговорни и можеби не ги знаат доволно политичките случувања и затоа даваат такви изјави, вели Села.