Двократниот италијански фудбалски клуб Фиорентина оди на продажба. Огласот го објави семејството Дела Вале во чија сопственост се „виолетовите“ од Фиренца од 2002 година. Трговците со кожна галантерија и чевли одлучија да се повлечат од клубот поради незадоволство на навивачите.
Диего и Андреа дела Вале го презедоа клубот како банкротиран, како четвртолигаш и без можност на користење на името. Но, набрзо успеаја да го откупија правото и привременото Фиренца Виола беше заменето со Фиорентина.
И тоа не е се. Гордоста на Тоскана, како што го нарекуваат тимот од „Артемио Франки“, во 2004 година се врати во Серија А по што следуваше период на стабилизација и етаблирање во врвт на италијанскиот фудбал. Намерата да излезат од Фиорентина доаѓа како последица на забелешките на фановите да инвестираат во клубот.
„Сопственичката структура на на Фиорентина објавува намера за препуштање на управување со клубот на потенцијални инвеститори за задоволување на навивачите кои бараат исчекор“, стои на официјалната интернет страница на клубот.
Навивачите, пак, во изминатите години очекуваа зацврстување на Фиорентина во Лигата на шампиони или во Лига Европа што не дочекаа, па затоа и нивното барање за продажба на „виолетовите“. Фиорентина, сепак, бележи прогрес во последните неколку сезони во Серија А, резултати што важат за најдобри од средината на 50-те години од минатиот век.
„Дојде време во кое оние кои го сакаат виолетовиот дрес веруваат дека клубот може да се води на поинаков начин. Заинтересираните треба да истапат и да го понудат своето знаење. Се надеваме дека проектот ќе заврши кај Флорентинци, а ние ветуваме дека ќе ги дочекаме со максимална транспарентност како потврда за почитта кон Фиорентина и граѓаните на Фиренца. Ќе разгледаме само сериозни понуди“, се додава во огласот.
Фиорентина го освои осмото место во Серија А во сезоната 2016/17, а неодамна беше промовиран Стефано Пиоли за нов тренер на екипата.