Илија Несторовски вечерва ја прослави „баксузната“ бројка на голови во дресот на Палермо во оваа сезона. Македонскиот репрезентативен напаѓач го постигна 13. гол за сицилијанците кои, се чини, имаа задоцнет финиш на „Енио Тардини“ во последниот меч од 33. коло во Серија Б. Парма беше подобра со 3:2 и со 53 бода се проби на четвртата позиција на табелата колку што има и Бари на петтата. Хет-трик за домашните постигна Емануеле Калајо во 31. минута, во 39. од пенал и во 47. минута.
Несторовски беше во стартниот состав на тимот од „Ренцо Барбера“. Ги одигра сите 90 минути, а во листата на стрелци се впиша во 53. за намалување на негативата на Палермо во тие моменти на 3:1. Александар Трајковски го почна мечот од клупата, но остана без минутажа на гостувањето кај Парма. И покрај поразот, Палермо е трет во конкуренцијата со 57 бода, еден помалку од Фросиноне на второто место и девет од лидерот Емполи.
Несторовски постигна по еден гол претходно и во дуелите со Специја, со Перуџа, со Пескара, со Авелино, со Фоџа и Асколи додека во улога на двоен стрелец беше против Про Верчели, против Карпи и против Виртус Ентела. Во наредното коло на 7 април Палермо ќе биде домаќин на тимот на Пескара.