Шест лица починаа, а 350.000 се лекуваа од зголемена температура и треска што се проширија „експлозивно“ низ Северна Кореја, објавија државните медиуми денеска, откако вчера Северна Кореја за прв пат призна пандемија од Ковид – 19.

Северна Кореја веројатно нема доволно тестови за Ковид -19 и рече дека не ја знае причината за масовните трески. Но, големата епидемија на коронавирусот може да биде катастрофална во земја со нарушен здравствен систем и невакцинирано население.

Севернокорејската централна новинска агенција соопшти дека од 350.000 луѓе кои развиле „треска“од крајот на април, 162.200 се опоравиле. Се вели дека 18.000 луѓе биле новооткриени со симптоми на треска само во четвртокот, а 187.800 луѓе се изолирани на лекување.

Едно од шесте лица кои починаа е заразено со варијантата омикрон, беше соопштено.

Невообичаено е изолираната Северна Кореја да признае избувнување на каква било заразна болест, а камоли за заканувачка болест како што е Ковид-19, бидејќи земјата сака да ја гледаат како силен и „непобедив“ систем. (адаптирано од АП)