Магнус Карлсен продолжува да доминира во светскиот шах. Норвежанецот од Тонсберг го порази Фабијано Каруана од САД во мечевите за титулата во Лондон до која стигна преку брзопотезните партии, откако сите 12 без временско ограничување за потези завршија со реми.
Старо-новиот светски шаховски шампион имаше прилика да слави и, со фудбалски речник, регуларниот дел. Во 12. партија имаше подобра ситуација на таблата и предност во време во однос на предизвикувачот меѓутоа понуди реми на општо изненадување на присутните во салата, на аналитичарите и на самиот Каруана.
Таквата негова одлука се покажа исправна иако впечаток беше дека го загуби статусот на фаворит во доигрувањето. Го доби првиот меч во тај-брејкот по што поведе и со 2:0, откако искористи голема грешка на неговиот ривал од САД. Каруана беше докрајчен со агресивна игра веќе во третата партија и покрај тоа што на Карлсен му беше доволно и реми во трите наредни надмудрувања на таблата.
За одбранетата титула, Карлсен е награден со над еден милион долари додека Американците ќе мора да причекаат до некоја наредна прилика да поздрават прв нивни сонародник со светска шаховска титула по Боби Фишер во 1972 година.