Дванаесеттата и последна партија за светската шаховска титула заврши идентично како и останатите 11. Со реми. Коментаторите и шаховските компјутери, се чини, беа благо наклонети на бранителот на тронот, Магнус Карлсен во понеделничкиот меч во Лондон со оглед на предноста што ја имаше на таблата и повеќе време за повлекување на преостанатите потези. Но, Норвежанецот, сепак, реши да понуди реми по 31 безначаен потег што предизвикувачот од САД, Фабијано Каруана без размислување го прифати во најкратката игра во финалната серија.
Двајцата вчера (вторник) уживаа во слободниот ден, а за денеска (среда) е закажана решавачкото надмудрување. По тринеделни повеќечасовни дневни партии, Карлсен и Каруана за првпат ќе се пресметаат во четири брзопотезни игри во кои секој од нив е временски лимитиран на 25 минути за одигрување на сите потези.
Во случај да нема победник, Карлсен и Каруана ќе преминат на пет серии по два блиц меча во кои ќе имаат само пет минути за влечење на сите потези. Ако еден од нив се стекне со предност по оваа рунда, ќе биде прогласен за нов светски првак во шах.
Карлсен важи за фаворит според овој формат. Тој моментно е број еден блиц играч во светот додека неговиот американски колега е на 18. место на ранг листата.
Ако и по десетте блиц партии биде нерешено, тогаш за титулата ќе решава т.н. „Армагедон игра“. Или во превод тоа значи дека по пат на ждрепка, едниот шахист ќе добие бели фигури и пет минути за сите потези додека другиот ќе игра со црни фигури и ќе има една минута помалку. Доколку резултатот остане егал, победник ќе биде играчот со црни фигури поради минусот од 60. секунди за играње.
Едно е сигурно. Шаховскиот свет го очекува долг и напорен ден во кој можеби ќе нема победник на партија, но, секако, ќе има шампион.