Победа без примен гол посакува Шкендија во вечерашниот дуел против ТНС во воведната рунда квалификации за Лигата на шампиони. Мечот меѓу македонскиот и велшкиот првак на „Телеком арена“ е со почеток во 20,15 часот.
„Екипата на ТНС го има нашиот респект. Повеќекратен шампион е на Велс, има доста искуство во меѓународните настапи. Игра фудбал што е типичен за поднебјето од кое доаѓа. Заклучок од анализите што ги направивме е дека знаат да играат и со офанзивна формација како 4-3-3, но и затворено во 5-4-1“, истакна тренерот на тетовци, Ќатип Османи.
Шкендија само вторпат ќе игра квалификации за ЛШ. Деби во натпреварувањето забележа во летото во 2011 година и беше експресно елиминирана од белградски Партизан. „Црно-белите“ тогаш славеа со 1:0 во Скопје и со убедливи 4:0 во реваншот. Но, ако тогаш ја носеа улогата на аутсајдери и од аспект на искуството и во однос на разликата на квалитет, „црвено-црните“ овојпат влегуваат во шампионски двомеч како фаворити иако не беа на страната на носители при ждрепката.
„Зад е период на добра работа и контролни мечеви. Верувам дека сме добро подготвени, верувам во успех. Фокусирани сме на нас самите, на нашата игра. Од навивачите очекуваме поддршка, а ние ќе возвратиме со добра игра и победа за пласман во наредната рунда што ќе ја потврдиме во реваншот“, порачува Арменд Алими на чија рака ќе биде капитенската лента по разделбата на Шкендија и Ферхан Хасани.
Олеснителна околност за стручниот штаб е Бесарт Ибраими. Напаѓачот на тетовци беше неизвесен поради повреда, но информациите од „црвено-црниот“ табор велат дека го издржал последниот тренинг и ќе биде прва закана по голот на велшки ТНС вечерва.
Од Министерството за внатрешни работи (МВР), пак, апелираат на фер и коректно навивање и на воздржаност од обиди за нарушување на јавниот ред и мир, во спротивно најавија нулта толеранција.
Лига на шампиони / квалификации
Прво коло / први мечеви / вторник
Талин: Флора (Естонија) – Хапоел Бер Шева (Израел)
Кутаиси: Торпедо (Грузија) – Шериф Тираспол (Молдавија)
Ереван: Алашкерт (Ерменија) – Селтик (Шкотска)
Дуделанж: Дуделанж (Луксембург) – Видеотон (Унгарија)
Тофтир: Викингур (Фарски Острови) – ХЈК Хелсинки (Финска)
Скопје: Шкендија (Македонија) – ТНС (Велс)
Корк: Корк Сити (Република Ирска) – Легија Варшава (Полска)
Косовска Митровица: Дрита (Косово) – Малме (Шведска)