Илјадници Бразилци се подготвуваат во Шапеко за дочек на посмртните останки на над 50 жртви во авионската несреќа што се случи во ноќта меѓу понеделникот и вторник во Колумбија. Меѓу настраданите е, речиси, целиот фудбалски тим на Шапекоенсе кој патуваше на дуел со Атлетико Насионал во финалето на Копа Судамерикана.
Три бразилски воени авиони, како што јавуваат светските медиуми, синоќа полетале од градот Меделин во чија непосредна близина падна леталото на боливиската компанија „Ламија“ со 77 патници и членови на екипажот. Нивното пристигнување во Шапеко е најавено за денеска во 11 часот по средноевропско време по што е планирана и комеморација, а поворка луѓе ќе се движи низ улиците до „Конда арена“ каде своите мечеви како домаќин ги игра Шапекоенсе.
Се проценува дека на комеморацијата ќе присуствуваат преку 100.000 луѓе, па затоа и околу стадионот ќе бидат поставени видео бимови бидејќи неговиот капацитет е со 19.000 места. На настанот е најавено присуство на Џани Инфантино, претседател на Светската фудбалска асоцијација (ФИФА) и на Мишел Темер, претседател на Бразил.
Телата на петмината Боливијци, членови на екипажот, синоќа беа транспортирани во земјата со авион на воздухопловните сили. Во своите држави се пренесени и ковчези на останатите осум загинати во несреќата, по еден во Венецуела и во Парагвај и шест во Бразил. Падот на авионот го преживеаја шест лица што властите во Колумбија веруваат дека бил предизвикан поради недостаток на гориво. Во тек е истрага за причините, анализа на содржината на црните кутии и комуникација меѓу пилотот и контролата на летање на аеродромот во Меделин. Конечните резултати се очекуваат да бидат готови за шест месеци.