Ја следиме состојбата со мигрантите на јужната граница, подготвени сме да се соочиме и со зголемување на притисокот, изјави денеска вицепремиерката и министерка за одбрана, Радмила Шекеринска. Како резултат на лажни вести, посочи, еден дел од бегалците кои биле стационирани во Грција мислеле дека балканската рута е отворена и заради тоа тргнале и кон нашата граница.
„Во текот на вчерашниот ден направивме консултации и Министерството за внатрешни работи, пред се, и ние како негова поддршка, сме подготвени да се соочиме и со зголемување на притисокот на границата. Тоа покажува дека е важно да се биде буден и подготвен“, изјави Шекеринска за време на НАТО трката во Скопје.
Како што дополни, состојбата се следи и не случајно таму имаме постојано армиско присуство што продолжи и во деновите во кои немаше ниту еден мигрант на границата. Сега, посочи, се гледа дека тоа бил оправдан чекор.
„Собранието неколкупати ја продолжуваше одлуката на границата да имаме и воена односно армиска поддршка дури и во периоди кога изгледаше дека опасноста поминала, меѓутоа и јас и министерот за внатрешни работи велевме дека во поглед на мигрантските кризи мора да се навикнеме на новата реалност, а тоа е дека таа опасност може да се создаде преку ноќ, и дека таа ќе биде најверојатно една од стандардните опасности и за нас, меѓутоа и за сите земји во регионот“, рече Шекеринска.
Во однос на барањата од турскиот министер за одбрана Хулуси Акар за преземање акција против припадници на Фето и дали тоа го загрозува нашето членство во НАТО, Шекеринска со одговор дека нема нови барања и нема што повеќе да каже од претходно кажаното од министерот за внатрешни работи.
„Се трудиме со секоја од земјите што долго време ни биле сојузници и го поддржувале нашето членство во НАТО да обезбедиме целосна поддршка на нашиот и да ги подобруваме нашите меѓусебни односи“, изјави министерката за одбрана Шекеринска.