Вицепремиерката и министерка за одбрана Радмила Шеќеринска вели дека преговорите за  името се непредвидливи, бидејќи  прашањето не зависи само од нас, но важно е да се постигне договор до јуни пред Самитот на НАТО  што треба да се одржи во јули.

Коментирајќи ја изјавата на грчкиот министер за надворешни работи Коѕијас дека нема време за влез на Македонија во НАТО, Шеќеринска вели дека земјава очекува да добие покана на јулскиот Самит, а извесно е дека членството  нема да се случи годинава.

„Ако решение се најде во јуни, тоа треба да донесе пресврт на Самитот во јули. Важно е процесот да успее, ако има политичка волја од двете страни. Македонија годинава не може да стане членка на НАТО, туку може да добие само покана која потоа треба да биде ратификувана во парламентите на земјите членки на Алијансата – период во кој Грција би се уверила дека се исполнува евентуалниот договор и од наша страна, кажа Шеќеринска.

Таа оценува дека за  Грција не е толку проблем членството во Европската унија, и дека има поголеми шанси да не блокираат за влезот во НАТО, но овие два процеса не треба да се одвојуваат. Шеќеринска напомена дека овој период колку и да е краток треба да се искористи, бидејќи во двете земји следуваат избори, (во Грција има  најави за предвремени избори во септемеври) што би го отежнале процесот на преговарање. „Под притисок на избори, потешко е да решавате вакви тешки прашања“ вели таа. Во актуелниот момент, Македонија има и „чисто досие“ во однос на другите реформи кои се бараат за влез во Алијансата и за добивање на покана се чека договорот со Грција.

Министерката за одбрана наредната недела патува за Америка на покана на  американскиот секретар за одбрана Џејмс Матис. Ова ќе биде прва посета на македонски министер за одбрана на САД од 2012 година.