Градоначалникот на Скопје, Петре Шилегов најави можност за спроведување на локален референдум на кој граѓаните ќе имаат прилика за изјаснување во врска со судбината на Универзална сала, доколку стручната јавност не успее да најде решение за објектот. Но, наведе дека за еден од белезите на главниот град има три опции и исто толку проекти.
„Првата опција е уривање на салата и изградба на нов објект на постојната локација, втората е уривање на салата со дислокација и заштита на просторот со конкурсот кој што е во тек, и третата е реставрација на постојниот објект и изградба на нов културен објект на друга локација која што ќе биде дополнително определена. Заедничкото решение можно е да се бара и на референдум на кој ќе се изјаснат граѓаните, доколку стручната јавност не успее да најде решение“, рече Шилегов.
На денешниот брифинг со новинарите, тој ја истакна и неговата фаворит опција – реставрација на стариот објект, како распишување за конкурс за одредување локација за уште еден, нов објект од таков вид. Град Скопје, според него, нема доволно средства за која било од овие три инвестици, па затоа ја нагласи потребата за поддршка од државата. Според првичните пресметки, трошоците за изградба на нова сала на нова локација и рестраврација на постојната би достигнале околу 20 милиони евра.