Кон крајот на денешното продолжение на конститутивната седница се разгореа репликите и контра-репликите а во кои учествуваа најммногу пратениците од македонските партии ВМРО-ДПМНЕ и СДСМ.

Пратеникот Петре Шилегов, за бесконечната расправа која се одвива веќе три дена а ќе продолжи и утре во 11 часот, вели, ниту пратениците од ВМРО-ДПМНЕ, со тоа што зборувале надвор од точката на дневен ред, не сакале да го гласаат Илија Димовски за претседател на Комисијата за избори и именување, а штета трпеле само граѓаните.

–  Цената која ја плаќаат граѓаните е 20.000 евра дневно. Цената на дневниците за обезбедувањето на лидерот на ВМРО-ДПМНЕ кој се шета низ Малта исто така чини 20.000 евра. Толку чини политичкото лудило на ВМРО-ДПМНЕ. Колку чини тоа што СДСМ треба да го плати? СДСМ со новата влада ја обезбедува слободата која нема цена, ја ослободуваме Македонија од диктаторскиот режим на Груевски. Македонија ќе биде парламентарна демократија, рече Шилегов.

По него се јави Крсте Мукоски од ВМРО-ДПМНЕ пак кој рече дека Шилегов зборувал за проценка, кога суверена, независна, унитарна Република Македонија нема цена.

– За жал многу несоодветни споредби правите. Македонија нема цена, тоа е разликата меѓу вас и меѓу нас. Го продадовте името, за Црвенковски продадовте дел од територијата а ова што денес го правите, го продавате унитарниот карактер на Македонија, му се обрати Мукоски на Шилегов.

Според него, СДСМ треба да разреши две работи: Прво да призна дека ја прифатиле т.н платформа, или јавно да кажат дека таква немало.