Екипата на Кит Го приреди вистинска сензација во шеснаесетфиналето во фудбалскиот Куп на Македонија. Амбициозниот клуб од Пехчево кој оваа сезона дебитира во Втора лига го совлада Шкупи со 2:0. За главната улога во натпреварот се избори Мартин Стојанов кој погоди во 13 минута и во четвртата од судиското екстра време. Уште поголема тежина на триумфот на пехчевци му дава фактот што 70-тина минути играа со човек помалку на тревникот по исклучувањето на Мирза Дураковиќ.
Второлигаш елиминира прволигаш и во Кавадарци. Тиквеш ја совлада Ренова со 2:1. Стрелци за победничката екипа беа Митев во 26. минута и Ивановски во 77. минута, единствениот за гостите од Џепчиште го постигна Рамадани во 67. минута.
Изненадување на останатите средби немаше. Најголем дел од фаворитите со убедливи победи се пласираа во осминафинале. Најубедлива меѓу нив беше Беласица чии фудбалери славеа на гостувањето кај Велазерими со 8:0. Гол помалку реализира Силекс против Братство Влазними (7:0), Работнички, пак, со 6:0 го елиминира скопскиот третолигаш Фортуна. Скопски Вардар триумфира со 4:0 против Вардар од Форино, победи по 3:1 на гости забележаа екипите на Скопје и на Академија Пандев над Вардар Неготино, односно, Лабуништа, со 2:0 Брегалница беше подобра од Поешево, а Македонија Ѓорче Петров од Превалец.
Мечот меѓу Струга Трим Лум и Победа е поместен за 29 август додека Кожув и Шкендија ќе играат на петти септември.
Куп на Македонија, шеснаесетфинале
Резултати
Вардар Форино – Вардар 0:4
Фортуна – Работнички 0:6
Братство Влазними – Силекс 0:7
Велазерими – Беласица 0:8
Поешево – Брегалница 0:2
Вардар Неготино – Скопје 1:3
Лабуништа – Академија Пандев 1:3
Превалец – Македонија Ѓорче Петров 0:2
Осогово – Пелистер 0:1
Тиквеш – Ренова 2:1
Тетекс – Гостивар 1:1 – на пенали 3:4
Кораб – Борец 1:0
Кит Го – Шкупи 2:0
Струга Трим Лум – Победа (29 август)
Кожув – Шкендија (5 септември)