Каталонија утрово е раздвижена. Илјадници граѓани во редици чекаат пред изборни места за да гласаат на референдумот за независност и покрај напорите на шпанската влада да го скрши секој обид за гласање.

Бирачките места предвидено е да се отворат во девет часот по локално време, но се уште е неизвесно дали гласањето ќе биде одржано.

Шпанската полиција испрати засилување, а во Барселона уште од утрото кон Каталонија се упатени и стотици полициски возила.

Изборната комисија за надгледување на гласањето е расформирана, а илјадници полицајци се распоредени да блокираат влез во изборни места.

Лидерот на Каталонија Карлес Пучдемон вети дека референдумот за независност на Каталонија, во која живеат 7,5 милиони луѓе, ќе се одржи иако Уставниот суд на Шпанија одлучи дека гласањето е неуставно.

Конзервативната влада на шпанскиот премиер Маријано Рахој смета дека референдумот е нелегален и вети дека ќе направи се за да биде спречено гласање.

Шпанската полиција доби наредба да ги испразни сите згради каде се собираат приврзаници на референдумот, а како ќе се однесуваат тие за таа наредба е клуч за успехот или пропаст на планираниот референдум.

Лидерот на Каталонија во 2014 година, Артур Мас организираше необврзувачки референдум на кој повеќе од 80 отсто гласаа за отцепување од Шпанија, но според противниците на оваа идеја, Каталонија, Баскија и Галиција се области кои внатре во Шпанија веќе имаат голема автономија.