Владата на Шпанија најави воведување на конкретни мерки за преземање на контрола над Каталонија. По објавата на Европската унија дека нема да посредува помеѓу Мадрид и Каталонија, за прв пат во историјата централната шпанска влада преку Уставот ќе се обиде да ја расформира регионалната влада за да ја земе Каталонија под свое управување.
Три недели по референдумот за независност на Каталонија, кој Шпанија не го прифати, Мадрид се уште тврди дека тој е нелегален.
„Каталонските власти го прекршија законот, а владеењето на правото е еден од основните принципи на Европската Унија“, истакна неодамна премиерот на Шпанија, Маријано Рахој.
Според шпекулациите, централната власт има на располагање неколку механизми како би го изведила тоа, од прогласување на кризна состојба до забрана за собири во Каталонија.
Централната власт ја има и поддршката од шпанскиот крал, кој пак ретко зборува за политика, но и тој не дозволува Каталонија да биде независна република.
Каталонските власти опонираат на изјави на Рахој и кралот Филип Шести, и најавија масовни протести.
По случувањата во Каталонија, најнова ситуација има на северниот дел од Италија, каде Ломбардија и Венета најавија референдуми за проширување на автономијата од централната власт во Рим, кои би имале повеќе симболично значење отколку конкретна идеја за отцепување од Италија.