Каталонија и нејзиното барање за независност исчезнаа од првите страни на европските медиуми овие денови но кризата е далеку од својот крај.
Вториот човек на каталонската влада Ориол Јункерас денес предупреди дека секоја понуда за дијалог упатена до Мадрид може да се однесува само на независноста на овој шпански регион.
Понудата за дијалог испратена до шпанската влада “мора да се однесува на изградба на република и нашиот ангажман за независност”, изјави Јункерас пред неговите сопартијци од Републиканската левица.
“Треба да биде јасно дека најдобар начин да се дојде до република и независност е да се разговара со сите или барем со меѓународната заедница. Но истовремено ние имаме целосен и апсолутен ангажман за примена на мандатот даден на 1 октомври”, додаде тој мислејќи на резултатите од референдумот за незвисност од 1 октомври кои велат дека 90 отсто од гласачите побарале развод од Мадрид.
Овие зборови се разбира не придонесуваат за смирување на страстите ниту во Мадрид ниту во Барселона ниту пак за доближување на ставовите на двете страни.
Претседателот на каталонската влада Карлес Пучдемонт унилатерално прогласи независност на Република Каталонија за потоа веднаш да ја суспендира за да дозволи отворање на дијалог со Мадрид. Тој побара меѓународно посредништво но шпанската влада на Мариано Рахој категорично го отфрли ова барање.
Рахој му остави рок до понеделник вечер на Пучдемонт кој треба да каже дали Каталонија прогласила независност или не. Доколку одговорот биде “да” Рахој му остава уште еден рок, до четврток. Доколку и овој пат Каталониците кажат дека прогласиле независност, Рахој се закани дека ќе укине автономијата на овој регион со примена на членот 155 од шпанскиот Устав. Можно е и апсење на каталонските високи функционери како Пучдемонт.
Сепаратистичкиот лидер се наоѓа помеѓу два огна. Од една страна бизнис круговите кои прават притисок велејќи дека разводот со Мадрид би бил катастрофа за овој најбогат шпански регион. Некои од бизнисите најавуваат дека ќе ја напуштат Каталонија. На ова Пучдемонт преку “твит” рече дека најавите се преселба на десетици претпријатија од Каталонија нема да има големо влијание на економијата на регионот.
Од друга страна, поборниците на независноста од Пучдемонт бараат да прогласи независност бидејќи, според нив, тоа е единствен начин да се почне со процесот кој води до Република Каталонија. Тие велат дека Мадрид секогаш одбивал и ќе продолжи да одбива дијалог со Барселона околу независноста. Оттука, според нив нема никаква логика декларацијата за независност да остане суспендирана.