Германската разузнавачка служба (БНД) долго време шпионирала повеќе високи функционери и компании во Соединетите Американски Држави, вклучувајќи ја и Белата куќа, објави денес магазинот „Шпигл“.
„Шпигл“ пренесува дека имал увид во документите кои што покажуваат дека германсакта разузнавачка служба имала листа од околу 4 илјади „избрани клучни зборови“ за надгледување во периодот од 1998-ма до 2006-та година. Тоа вклучувало броеви на телефони или факсови, мејл адреси на Белата куќа како и министри за финансии и надворешни работи.
Меѓу другите „мети“ на германските разузнавачки служби се најдоа воени институции, вклучувајќи ги американските воздухопловни сили и морнарицата, НАСА, како и организацијата “Human Rights Watch”. Агенцијата „АФП“ пренесува дека од БНД не сакале да дадат коментар во врска со овие тврдења на „Шпигл“.
„Шпигл“ кон крајот на февруари објави дека германската тајна служба долго време ги шпионирала новинарите на BBC, New York Times, Reuters и други странски медиуми. Повикувајќи се на документите во кои што имале увид, неделникот тогаш пишувал дека БНД имале најмалку 50 телефонски броеви, факсови и мејл адреси на новинари или редакции ширум светот на својата таканаречена листа на „селектори“ во 1999-та година.
Како што е наведено, мета на шпионирањето на германските тајни служби биле неколку броеви од редакцијата на BBC во Лондон и Авганистан, потоа New York Times во Авганистан, како и редакциите на Reuters во Авганистан, Пакистан и Нигерија. Од BBC реагираа и соопштија дека се разочарани од ваквите информации и ги повикаа сите влади да ја почитуваат слободата на медиумите.
Организацијата „Репортери без граници“ ги окарактеризира информациите за шпионирањето како „монструозен напад на слободата на медиумите“, а германската разузнавачка служба ниту тогаш не сакаше да ги коментира тие обвинувања.
Германската влада остро реагираше кога во 2013-та година протече информацијата на Едвард Сноуден според која американски агенти прислушкувале ширум светот, вклучувајќи го и мобилниот телефон на Ангела Меркел. Француската агенција „АФО“ пренесува дека тогаш токму од БНД им помогнале на американците, поточно агенцијата „НСА“ да ги шпионира европските сојузници.