Брисел ги потцени културните разлики помеѓу Источна и Западна Европа но политичката ситуација на континентот ќе беше полоша доколку источните земји не беа примени во ЕУ, изјави Мартин Шулц, претседателот на Европскиот парлемент (ЕП) во интервју за Sueddeutsche Zeitung.
“Со оглед на сегашниот политички став на Русија, замислете Полска и балтичките земји да не беа членки на ЕУ? Ќе имаше длабока неизвесност на целиот континент и можен страв од војна. Затоа беше историски добро да се примат овие земји и исто така беше добро што се воведе еврото”, вели Шулц.
Првиот човек на ЕП е убеден во доброто на европската идеја но смета дека некои политичари живеат во “бриселскиот меур” и загубиле допир со загриженоста на нивните гласачи.
Според него голем проблем е тоа што националните лидери не успеале да им ја објаснат на нивните гласачи учеството во европскиот проект и зошто некои компетенции на владите се префрлаат во Брисел:
“Истите луѓе кои климаат со глава во Брисел, дома тврдат дека некои анонимни сили им прават пресија. Тоа е смртно опасно”, тврди Шулц.
Шулц вели дека генерацијата на политичари како Хелмут Кол и Франсоа Митеран доаѓале во Брисел со став дека Европа треба да биде силна во интерес на нивната сопствена земја:
“Генерацијата на Виктор Орбан вели – треба да ги браниме интересите на нашата земја од Европа. Како да некој од Брисел ги напаѓа”, вели Шулц.
Според него, ЕУ ќе биде моќна онолку колку што националните влади на земјите членки тоа ќе го дозволат.
Мартин Шулц е пратеник во ЕП од 1994 година и подоцна избран за претседател. Наскоро тој ја напушта оваа фукнција и се враќа на германската политичка сцена.