Од силното невреме што го погоди речиси целиот албански брег, создавајќи високи бранови во морето, две лица го загубија животот, а 15 се спасени благодарение на пожртвуваноста на крајбрежната стража, на која на помош и пристапиле и припадници на специјалната единица за брзи интервенции.

Високи бранови во Ѓири и Лазрит погодиле скутер што го управуло момче на 33-годшна возраст кое им подлегнало на повредите во болницата во Драч во која, според албанските медиуми, почина и 50 годишна жена која била извлечена од морето, но лекарите не успеале да ја спасат.

Во меѓувреме двајца туристи во Велипоја, од кои едно дете, биле навреме спасени од високите бранови што се формирале како последица од невремето.

Албанската гранична полиција спасила 14 лица меѓу кои и девет туристи од Чешка кои биле блокирани во пристаништето Вилун кај Велипоја. Останатите пет лица потекнуваат од Албанија и од Косово, сите се хоспитализирани и се надвор од животна опасност.

Властите апелираат до сите туристи да бидат максимално внимателни и за било каква потреба да се јават на бесплатниот телефонски број 112. Поради невремето во Албанија, во прекин е морскиот сообраќај.