Пописот веројатно ќе се одржи во 2020-та година. Тоа ќе биде во согласност со меѓународните препораки да се одбере година што завршува на нула или на еден и со напорите да се избегне политизација, со оглед дека 2019 и 2021-ва се изборни години, вели директорот на Заводот за статистика Апостол Симовски.
Тој вели дека нема да се дозволи политизација, бидејќи како што истакнува пописот во 2011 пропаднал токму заради политиката која влегла на голема врата со формирањето државна пописна комисија.
Симовски мисли дека нема потреба населението да се попишува според етничката припадност. Според препораките на Обединетите нации, вели тој, ова влегува во категоријата споредни белези, се прибира главно на Балканот и се користи само за политички цели.
Според него Владата и од Собранието до крајот на годината треба да го донесат законот, по што ќе почнат технички и технолошки подготовки, набавка на 6 илјади компјутери, апликации и друго. Се планира пописот да чини околу 8 и пол милиони евра, за разлика од пропаднатиот попис проценет на 14 милиони. Освен анкетите лице в лице, ќе се користат регистрите на другите институции, а сите податоци наместо на хартиени обрасци ќе се внесуваат во компјутер.
За резултатите нема да се чека година и половина, бидејќи ќе бидат готови за само три месеци. Во 2019 се планира пробен попис во неколку пилот општини.
Изјавата на Симовски доаѓа ден откако СЈО објави истрага под кодно име „Попис“, каде осомничени се поранешниот претседател на ВМРО ДПМНЕ Никола Груевски и актуелниот лидер на ДУИ Али Ахмети, за кои според прислушуваните разговори постои основано сомневање дека во октомври 2011 ја злоупотребиле службената положба и овластување за да го прекинат започнатиот попис.
-Во 2011 јас бев член на Државната пописна комисија и бев сведок на сето тоа што се случуваше таму и на непропорционалното имплементирање на методологијата за попишување на населението, посебно од Државниот завод за статистика, како и пописната комисија на терен и на централно ниво. Пописот не е пропаднат, туку е прекинат со одлука на Собранието и со волјата на пратениците избрани од народот. По предлог на Владата, пратениците изгласаа закон за прекин на пописот, тоа е процесот, така се случи, тоа беше направено пред очите на целата јавност во 2011 година, изјави Груби.
За вечерва е закажана седница на Централното претседателство на ДУИ, на која би се разговрало за имплементацијата на партиската програма во владината политика, иако не се исклучува можноста да стане збор и за оваа истрага.
Екс премиерот и лидер на ВМРО ДПМНЕ Никола Груевски вчера изјави дека не бил вклучен во постапката за пописот и ги негираше обвинувањата.
-Во спроведувањето на пописот имаше Државна комисија која си ја работеше својата работа и цврсто верувам дека тоа го правеше одговорно и професионално. Сите и во политиката и граѓаните следевме што се случува и бевме загрижени да не има некакви проблеми, но одлуките си ги носеа тие. Ние само можевме да следиме. Ова го сметам како обид на СЈО да го дефокусира вниманието на јавноста од она што се случува во земјата, рече Груевски.