Две екипи истражители од Организацијата за забрана на хемиско оружје (ОПЦВ) денеска и утре треба да пристигнат во Сирија, за да го истражат наводниот смртоносен хемиски напад во градот Дума, соопшти сирискиот амбасадор во ОН, Башар Џафари.
Овие две групи ќе пристигнат во Сирија одделно, денеска и во петок наутро.
Според него, сириските власти „се подготвени да ги спроведат секаде каде што сакаат, кога ќе посакаат, и веднаш штом ќе посакаат“.
Џафари додаде дека од ОПЦВ во сириската Амбасада во Брисел биле испратени четири пасоши и оти визи биле веднаш издадени. Покрај тоа, Сирија е подготвена да издава визи на инспектори и на границата со Либан, информира амбасадорот.
ОПЦВ потврди дека нејзини инспектори од сабота ќе почнат со работа на терен во Сирија.
Во меѓувреме, руските воени бродови ја напуштиле воено-морската база Тартус во Сирија поради безбедност, изјави руски пратеник.
Се работи за 11 воени бродови на руската армија стационирани во тоа пристаниште.
Таму се стационирани и противракетни системи С-300 и С-400.
Според него, Евроконтрол веќе објавила соодветна информација.
Генералниот секретар на НАТО Јенс Столтенберг денеска изјави дека силно ја осудуваат употребата на хемиско оружје во Сирија и дека тоа е закана за меѓународниот мир и безбедност.
– Го повикуваме сирискиот режим и неговите поддржувачи да дозволат укажување меѓународна медицинска помош и меѓународни набљудувачи, додаде тој.
Столтенберг ги повика виновниците за употреба на хемиско оружје да понесат одговорност.
– Треба да ја заштитиме забраната за хемиско оружје, истакна генералниот секретар на Алијансата.
Шведска денеска поднесува нацрт резолуција во ОН за испраќање мисија на Светската органзиација во Сирија за да се ослободи таа држава од хемиско оружје „еднаш засекогаш“, јави АФП кои имале увид во текстот.
Предлогот е презентиран пред затворениот состанок на СБ на ОН на кој ќе се разговара за заканите за воена акција против Сирија.
Ситуација Сирија: Дали светот е на прагот на трета светска војна
Ситуацијата во Сирија и натаму е тензична, по заканите на американскиот претседател Доналд Трамп дека се подговени воено да одговорат на хемискиот напад во Дума, а на што поддршка најавија дека ќе дадат и повеќе европски земји.